{"id":6560,"date":"2020-02-18T19:20:47","date_gmt":"2020-02-18T19:20:47","guid":{"rendered":"https:\/\/www.wcia.org.uk\/?page_id=6560"},"modified":"2026-03-03T16:31:54","modified_gmt":"2026-03-03T16:31:54","slug":"treftadaeth-gwirfoddoli-rhyngwladol","status":"publish","type":"page","link":"https:\/\/cymru.global\/cy\/ein-gwaith\/treftadaeth-heddwch\/treftadaeth-gwirfoddoli-rhyngwladol\/","title":{"rendered":"Treftadaeth Gwirfoddoli Rhyngwladol"},"content":{"rendered":"

Mae’r sefydliad gwirfoddoli rhyngwladol Cyfnewid UNA wedi’i leoli yn y Deml Heddwch<\/a> ers 1973 – fe’i sefydlwyd ochr yn ochr \u00e2 Chanolfan Materion Rhyngwladol Cymru<\/a>. Roedd yn adeiladu ar lwyddiant y Gwasanaeth Ieuenctid Rhyngwladol ar \u00f4l yr Ail Ryfel Byd, a ddatblygwyd drwy’r UNA \u2013 sef Cymdeithas y Cenhedloedd Unedig<\/a> \u2013 ac mae wedi esblygu i fod yn un o’r elusennau gwirfoddoli uchaf eu parch yng Nghymru, sydd \u00e2 hanes o ganolbwyntio’n bennaf ar gynhwysiant cymdeithasol, dysgu rhyngddiwylliannol, dealltwriaeth a sgiliau ar gyfer dinasyddiaeth fyd-eang<\/strong>.<\/p>\n

Cyfnewid UNA Heddiw<\/h3>\n
\"\"<\/a>
Gwirfoddolwyr Cyfnewid UNA yn cael hyfforddiant cyn gadael yn y Deml Heddwch yn ddiweddar<\/figcaption><\/figure>\n

Mae Cyfnewid UNA yn cynnig cyfleoedd i wirfoddolwyr gyflawni lleoliadau tramor<\/a> am gyfnodau byr a hir ledled y byd; cymryd rhan mewn gwersylloedd gwaith cyfnewid yng Nghymru<\/a> a lleoliadau profiad gwaith<\/a> sy’n croesawu gwirfoddolwyr rhyngwladol o lu o wledydd bob blwyddyn; a chwilio am brosiectau<\/a> gyda gwledydd neu them\u00e2u penodol. Rydyn ni’n gweithio trwy bartneriaid yng Nghynghrair Sefydliadau Gwasanaeth Gwirfoddol Ewrop <\/a>\u00a0a CCIVS – y corff Cydlynu Byd-eang ar gyfer Sefydliadau Gwasanaeth Gwirfoddol Rhyngwladol<\/a>.<\/p>\n

Ers 2020, mae Canolfan Materion Rhyngwladol Cymru a Chyfnewid UNA wedi uno<\/a> er mwyn ‘cronni adnoddau’ fel bod modd i ni gynyddu’r cyfleoedd i genedlaethau’r dyfodol ymelwa ar wirfoddoli rhyngwladol. Mae Canolfan Materion Rhyngwladol Cymru yn gwahodd gwirfoddolwyr blaenorol, presennol ac arfaethedig i gyfrannu at yr Adolygiad ar Ddyfodol Gwirfoddoli Rhyngwladol, ac i gyfrannu hefyd tuag at ein prosiect Treftadaeth Heddwch a Rennir – straeon a phrofiadau personol sy’n dathlu effaith Cyfnewid UNA ar genedlaethau olynol o bobl ifanc sy’n ymgysylltu \u00e2’r byd ehangach.<\/p>\n

\"\"<\/a>
Gwersyll gweithio yn Awstria yn ystod y pumdegau yn cynorthwyo ag ailadeiladu cymunedol ar \u00f4l yr Ail Ryfel Byd<\/figcaption><\/figure>\n

Tarddiad: Ailadeiladu ar \u00f4l yr Ail Ryfel Byd<\/h3>\n

Trefnwyd y gwersyll gweithio cyntaf i wirfoddolwyr rhyngwladol yng Nghymru yn 1932 gan y Crynwyr, a fu’n gweithio gyda phobl o’r gymuned leol ym Mryn-mawr i adeiladu pwll nofio.<\/p>\n

Mae Cyfnewid UNA yn tarddu o ddwy raglen ail-adeiladu ar \u00f4l yr Ail Ryfel Byd a ddatblygwyd yn ystod y pedwardegau hwyr drwy’r Gwasanaeth Ieuenctid Rhyngwladol UNA-UK yn Llundain. Chwaraeodd UNA Cymru r\u00f4l hynod weithgar yn y Gwasanaeth Ieuenctid Rhyngwladol, yn arwain llawer o wersylloedd gweithio yng Nghymru a oedd yn croesawu gwirfoddolwyr o bedwar ban byd.<\/p>\n

Pan benderfynodd y Gwasanaeth Ieuenctid Rhyngwladol ddod \u00e2’i raglen gwersylloedd gweithio ledled gwledydd Prydain i ben, aeth y pensaer a’r ymgyrchydd UNA o Gaerdydd, Robert Davies<\/a> – gyda chefnogaeth llawer o bobl eraill – ati i sefydlu ‘Gwasanaeth Rhyngwladol Cymdeithas y Cenhedloedd Unedig Cymru’ – a dyfodd o nerth i nerth.<\/span><\/p>\n